El l.lunes 23 abriránse los actos conmemorativos de las nuesas l.letras con una exposición fotográfica d'Andrés Monteavaro: "Paisaxes postindustriales: una mirada al patrimonio esqueicío".

El martes, pola súa parte, el protagonismu recairá nos más pequenos, yá que celebraremos la II Xunta d'Escolinas ya Escolinos del Conceyu Cangas, disfrutando d'una serie d'actividades, ente las que s'alcuentran: una obra de teatru, Nora, nena de sal, de la compañía Factoría del Norte; una visita comentada a la Escuela de Música Tradicional del Conceyu Cangas, un conciertu de Rock and guah.es ya una sesión de micro abiertu, pa que l'alumnáu comparta con todos nós la súa creatividá manifiesta nel Anfiteatru d'El Fuexu.

El miércoles 25, Rafa Lorenzo cantarános las cuarenta no Teatru Toreno.

El xueves, pola súa parte, conoceremos más sobre la gaita asturiana de la mano de Juan Alfonso Fernández García, director del Muséu de la Gaita.

El vienres fairemos l'homenaxe merecíu a Benita'i Xuacu de Vidal ya disfrutaremos de la obra de teatru El secretu bien guardáu, adaptación de la obra homónima d'Alejandro Casona feita pol grupu de teatru amateur "Muyeres por Grau".

P'acabar, el l.lunes 30, garrará'l testigu la nuesa mocedá, yá que se celebrará la I Xunta de la Mocedá cona L.lingua nel IES Cangas del Narcea, cona representación de Llázaro de Tormes, a cargu de Carlos Alba "Cellero".

Paralelamente a los actos programaos, haberá dúas actividades d'interés:

• Cita a ciegas con un l.libru, qu'anima a tolas personas interesadas a aveirase  pola Casa la Cultura "Palaciu d'Oumaña" a arriesgase a cayer namoradas de las nuesas l.letras.
• Pisando sobre los nuesos raizones l.literarios, que pretende visibilizar la nuesa l.literatura mediante frases grafiadas nos pasos peoniles, previamente escoyidas polas escolinas ya escolinos de los nuesos centros educativos.

La conceyala de Cultura, Carmen Riesco Combarro, considera fundamental siguir trabayando pola dignificación ya normalización del nuesu idioma mediante actividades que lu visibilicen cumo éstas, de las que destaca la variedá de temática ya públicu, muestra inequívoca de la capacidá comunicativa infinita del nuesu idioma cumo eixe vertebrador de la nuesa comunidá.

Imágenes